Банк жаңылыктары

Компаньон Банкы Жылдыз Малдыбаеванын 24 прелюдиясынын тарыхый премьерасын колдоду

25-июнда А. Малдыбаев атындагы Кыргыз улуттук академиялык опера жана балет театрынын Малахит залында өлкөнүн маданий турмушундагы өзгөчө окуя болуп өттү — Кыргызстандын биринчи аял-композитору, Кыргыз Республикасынын эл артисти Жылдыз Малдыбаеванын 24 прелюдиясы толугу менен биринчи жолу бир концертте аткарылды.

Бул чыгармаларды дүйнөгө белгилүү пианист Алексей Холодов аткарды. Концерт Кыргызстандын музыкалык мурасын сактоо долбоорунун алкагында өткөрүлүп, анын жүрүшүндө келечектеги музыкалык альбом үчүн бардык прелюдиялардын профессионалдык аудио жазуусу жасалды.

Компаньон Банкы бул маанилүү маданий долбоордун өнөктөштөрүнүн бири болгонуна сыймыктанат.

Бул тарыхый окуянын бир бөлүгү болууга мүмкүнчүлүк түзүп берген уюштуруучуларга терең ыраазычылык билдиребиз. Мындай демилгелер кыргыз элинин бай маданий мурасын сактоого, аны кеңири жайылтууга жана келечек муундарга жеткирүүгө чоң салым кошот.

Маданиятты, билим берүүнү жана улуттук мурасты колдоо Компаньон Банкынын социалдык жоопкерчилигинин маанилүү багыттарынын бири болуп саналат. Биз мындай долбоорлор коомду шыктандырып, муундардын байланышын бекемдеп, өлкөнүн маданий баалуулуктарын сактоого көмөктөшөт деп ишенебиз.

Бул өзгөчө музыкалык кечени уюштурган бардык уюштуруучуларга, катышуучуларга жана конокторго ыраазычылык билдиребиз.