Банк жаңылыктары

Өзгөн жана Сузак райондорунун тургундары финансылык сабаттуулук жана айыл чарбасын өнүктүрүү боюнча тренингдерге катышты

Компаньон Банкы финансылык сабаттуулукту жогорулатуу жана туруктуу киреше булактарын өнүктүрүү боюнча долбоорлордун алкагында эмгек мигранттарынын үй-бүлөлөрү жана Кыргызстандын аймактарынын жашоочулары үчүн билим берүү программаларын ишке ашырууну улантууда.

Өзгөн районунун Кара-Дарыя айылында эмгек мигранттарынын үй-бүлөлөрү үчүн финансылык сабаттуулук боюнча тренинг өттү. Катышуучулар үй-бүлөлүк бюджетти башкаруу, финансылык кызматтарды коопсуз пайдалануу жана каражат топтоо мүмкүнчүлүктөрү тууралуу маалымат алышты. Өзгөчө кызыгууну депозиттер жана акча топтоо темалары жаратты. Ошондой эле катышуучулар Компаньон Банкынын мобилдик тиркемесинин мүмкүнчүлүктөрү менен таанышты.

Финансылык сабаттуулук боюнча дагы бир тренинг Сузак районунун Ленин айылында өткөрүлдү. Катышуучулар жеке каржыны пландоо, санариптик банктык кызматтарды колдонуу жана үй-бүлөнүн финансылык туруктуулугун жогорулатуу боюнча практикалык сунуштарды алышты.

Финансылык сабаттуулук менен катар Компаньон Банкы айыл чарба ишкердигин өнүктүрүүнү да колдойт. Өзгөн районунун Жазы айылында эмгек мигранттарынын үй-бүлөлөрү, фермерлер жана райондук ветеринардык адистер үчүн агро-тренинг өткөрүлдү.

Иш-чаранын өзгөчө баалуулугу практик-эксперт, айыл чарба илимдеринин кандидаты жана майда мүйүздүү малдын бир нече породасынын автору Тарбиз Халяповдун катышуусу болду. Катышуучулар жандуу баарлашуу форматында мал багуу боюнча актуалдуу маселелерди талкуулап, көп жылдык илимий жана практикалык тажрыйбага негизделген кесипкөй сунуштарды алышты. Ошондой эле фермерлер өз чарбаларында күн сайын кездешкен реалдуу кырдаалдарды талдоого мүмкүнчүлүк алышты.

Тармактык адистерди тартуу окутууну мүмкүн болушунча практикага багытталган кылууга жардам берет. Катышуучулар өз чарбасын өнүктүрүүдө жана үй-бүлөлүк кирешени көбөйтүүдө натыйжалуу чечим кабыл алууга көмөктөшүүчү актуалдуу билимдерге жана сунуштарга ээ болушат.

Компаньон Банкынын билим берүү программалары калктын финансылык сабаттуулугун жогорулатууга, ишкердик көндүмдөрүн өнүктүрүүгө жана өлкөнүн аймактарындагы туруктуу киреше булактарын бекемдөөгө багытталган.

Тренингдерге катышуу акысыз жана бардык каалоочулар үчүн ачык.